Gisaka na ang security alert sa U.S. Embassy sa Pilipinas human nga nakabsan sa kinabuhi ang duha ka Filipino-American sa engkwentro tali sa militar ug New People’s Army (NPA) sa Toboso, Negros Occidental niadtong Abril 19.
Tungod niini, gipasidan-an sa embahada ang mga American citizens nga likayan ang mga lugar nga adunay aktibong operasyon sa militar, lakip ang Negros, Leyte, Samar, ug Mindoro.
Giisip sa gobyerno sa U.S. ug Pilipinas ang New People’s Army (NPA) isip usa ka foreign terrorist organization.
Gipahimangno sa embahada nga ang mga Amerikano nga mag-amping sa pagbyahe sa mga rural nga lugar ug mopahawa dayon kung makakita og armadong grupo.
Kabahin niini, nagpagawas usab sila og Demonstration Alert kalabot sa Labor Day protests sa Metro Manila.
Gimanduan ang mga U.S. citizens nga likayan ang dagkong pagtapok aron malikayan ang posibleng kagubot.
Ang maong alerto kabahin sa mas gipakusgan nga security measures sa embahada sa nasod.
