Gipasulod sa Sandiganbayan First Division ang “not guilty plea” alang kang Senador Rodante Marcoleta human siya mibalibad sa pagsumite sa iyang plea sa kasong paglapas sa Presidential Decree 46 tungod sa pending nga mosyon sa Korte Suprema.
Sumala pa sa korte, gidili ubos sa Presidential Decree 46 ang pagdawat og regalo sa mga opisyal sa gobyerno. Dugang pa niini, ang kaso may kalabotan sa giingong wala madeklarang P75 milyon nga donasyon nga nadawat ni Marcoleta sa wala pa ang 2025 midterm elections sa dihang midagan siya isip senador.
Kahinumduman nga giingon sa Ombudsman nga nabayran lamang ang buhis alang sa maong donasyon niadtong Disyembre 2025, o halos 11 ka bulan human kini gidawat niadtong Enero 2025. Sa laing bahin, nagpadayon sa iyang pagpanalipod si Marcoleta ug miinsistir nga inosente siya, samtang gitawag niyang politically motivated ang mga kasong gisang-at batok kaniya.
