Gihulagway ni Vice President Sara Duterte ang korapsyon isip usa ka “progressive disease” o sakit nga padayong nagkagrabe ug lalom nang nakagamot sulod sa gobyerno, nga giila niyang dakong babag sa pagkab-ot sa mas maayong kaugmaon sa mga Pilipino.
Sumala pa kang Duterte, dakong babag ang korapsyon sa paghatag og mas daghang oportunidad sa katawhan ug sa pagpalambo sa nasud.Gani, giawhag niya ang publiko nga dili lamang magsalig sa gobyerno sa pagsulbad sa maong problema, kondili aktibo usab nga motuman sa ilang responsibilidad isip mga lungsoranon.
Lakip niini ang pagsunod sa balaod, pagsalikway sa bisan unsang porma sa korapsyon, pagpanalipod sa ilang tagsa-tagsang komunidad ug pagpapanubag sa mga opisyal sa gobyerno sa ilang mga lihok ug desisyon. Samtang, may kalabotan sa nagpadayon nga impeachment proceedings batok sa bise presidente, gikatakdang ipadayon karong Huwebes ang impeachment trial human sa tulo ka adlaw nga pagsuspinde sa mga pagdinig tungod sa pagpahigayon sa ASEAN Summit.
Gilauman nga mopresentar ang kampo sa depensa og upat ka testigo aron motubag sa mga alegasyon nga gilakip sa impeachment complaint. Lakip sa mga testigo ang tulo ka indibidwal nga motubag sa mga pangutana kalabot sa operasyon sa Cale88 Foods Corp., samtang ang usa motuki sa mga isyu nga may kalabotan sa Anti-Money Laundering Act o AMLA.
Pinaagi sa ilang mga pagpamatuod, gilauman nga ipresentar sa depensa ang dugang nga mga detalye ug impormasyon nga ilang giingong may kalabotan sa mga alegasyon batok sa bise presidente.
Sa pagkakaron, magpadayon ang impeachment trial isip kabahin sa proseso sa Senado sa pagtimbang-timbang sa mga ebidensiya ug pagpamatuod sa duha ka kampo sa maong kaso.











