Gimandoan sa Sandiganbayan si Senador Rodante Marcoleta nga magpasabot nganong dili siya angay nga ipailalom sa preventive suspension gikan sa iyang posisyon isip senador samtang gipadayon ang pagdungog sa kasong plunder nga gisang-at batok kaniya.
Sa mando sa korte, gihatagan si Marcoleta og 10 ka adlaw aron isumite ang iyang pagpasabot.Sumala sa Sandiganbayan, ubos sa Section 5 of Republic Act No. 7080, o ang Anti-Plunder Act, ug Section 4, Rule VIII sa 2018 Revised Internal Rules of the Sandiganbayan, kinahanglan ipadayag sa senador nganong dili siya angay nga ma-suspend isip kasamtangang miyembro sa Philippine Senate.
Mitambong si Sen. Marcoleta sa iyang arraignment kaniadtong Miyerkules, Hulyo 22, 2026 ug mipasaka og not guilty plea sa kasong plunder ug paglapas sa Presidential Decree No. 46 o Anti-Graft and Corrupt Practices Law, nga nagdili sa mga opisyal sa gobyerno sa pagdawat og regalo o bisan unsang pabor tungod sa ilang posisyon.
Kahinumdoman nga nagsang-at ang Office of the Ombudsman og kasong plunder batok sa Senador kaniadtong Hulyo 3, 2026 tungod sa alegasyon nga midawat siya og kinatibuk-ang ₱75 milyon nga wala ideklarang donasyon sa panahon nga kongresista pa siya. Nag-atubang usab siya og laing kaso tungod sa alegasyon nga midawat og ₱25 milyon gikan sa negosyanteng si Joseph Espiritu, nga ginadili ubos sa anti-gift law.
Samtang, ang mga kaubang akusado Marcoleta sa kasong plunder nga sila kanhi Congressman Mike Defensor ug mga negosyanteng sila Joseph Espiritu ug Aristotle Viray, mipasaka usab og not guilty plea atol sa ilang arraignment kaniadtong Hulyo 15, 2026.
