Nagpatuman ang Russia og dako ug halapad nga nuclear exercises diin gilunsad niini ang nuclear-capable missiles ug gipakita ang paggamit sa nuclear munitions sa pipila ka military units samtang nagkakusog ang tensyon tali sa NATO may kalabotan sa gubat sa Ukraine.
Subay sa impormasyon, mokabat sa 64,000 ka mga sundalo ug personnel ang miapil sa maong drills nga giila isip usa sa pinakadakong nuclear training sa Russia sulod sa miaging mga tuig.
Dugang pa niini, tumong sa maong ehersisyo mao ang pagsusi sa pagpangandam sa ilang nuclear forces kung adunay posibleng agresyon batok sa nasud.
Sa gipahayag ni Russian President Vladimir Putin, giingon niya nga ang paggamit sa nuclear weapons magpabilin isip pinakaulahing opsyon, apan gihatagan og gibug-aton ang panginahanglan nga mapalig-on ang nuclear capability sa Russia ug Belarus tungod sa nagkataas nga global threats.
Lakip sa gihimong drills, nag-test launch ang Russia sa lain-laing missiles sama sa Yars intercontinental ballistic missile, Zircon hypersonic missile, ug Sineva ballistic missile. Sa kasamtangan, gipakita usab sa militar ang ilang nuclear submarines ug hypersonic missile systems isip kabahin sa operasyon.
Dugang pa niini, nagpadayon ang pagbinayloay og isog nga estorya tali sa Russia ug pipila ka NATO member states sa Baltic region.
Gipasaginlan sa Moscow ang Baltic countries nga nagtugot kuno sa paggamit sa ilang airspace alang sa drone attacks batok sa Russia, apan kini hugot nga gipanghimakak sa NATO.
