Ipadala pag-usab ngadto sa China ang presko nga durian gikan sa Davao Region karong Nobyembre, human mapirmahan ang kasabutan atol sa China-ASEAN Expo nga gipahigayon sa Nanning, China.
Gilauman nga mokabat sa usa ka container nga adunay gibana-banang 14 ka tonelada nga durian ang unang shipment padulong sa nasangpit nga nasud.
Kabahin niini, mibisita sa Department of Agriculture Region 11 (DA-11) sa Bago Oshiro ang mga representante sa Chinese trading company nga Raspina Tropical Fruits ug Eng Seng Food Products kagahapon aron hisgotan ang pagpadayon sa pag-eksport sa maong prutas.
Sumala kang DA-11 Regional Executive Director Macario Gonzaga, kinahanglan pang dugangan ang produksyon sa nagkalainlaing klase sa durian aron matubag ang dakong panginahanglan sa merkado sa China ug uban pang export market.
Gipasiugda usab niya ang pagmintinar sa kalidad sa durian aron masiguro nga makatuman kini sa mga sumbanan nga gikinahanglan sa internasyonal nga merkado.
Sa kasamtangan, gilauman nga makatabang ang pagbalik sa eksport sa durian ngadto sa China sa pagpalapad sa merkado sa mga lokal nga mag-uuma ug prodyuser sa Davao Region.
