Usa ka tawo ang namatay samtang 16 ang nangaangol human gilusad sa Russia ang usa sa labing dako nga pagpangatake gamit ang mga missile ug attack drone sa kaulohan sa Ukraine nga Kyiv.
Sumala sa Air Force sa Ukraine, naglunsad ang Russia og kapin sa 40 ka nagkalain-laing klase sa missile, lakip ang ballistic ug hypersonic missiles, ingon man 125 ka attack drone, diin kadaghanan gitumong sa Kyiv.
Tungod sa maong pagpangatake, mibuto ang dagkong sunog sa lima ka distrito sa siyudad ug grabeng nadaot ang mga puy-anan sa mga sibilyan, bodega, supermarket ug ang agianan sa Lukianivska metro station.
Human niini, nanawagan si Ukrainian President Volodymyr Zelensky sa mga kaalyadong nasod nga padad-an pa ang Ukraine og dugang air defense missile interceptors.
Matud ni Zelensky, nag-atubang karon ang ilang nasod og kakulang sa Patriot missile system, nga giila nilang usa sa labing epektibong panalipod batok sa mga missile sa Russia aron mapanalipdan ang mga sibilyan.
