Gipadali sa gobyerno ang pag-install sa rooftop solar panels alang sa mga panimalay, health facilities ug gagmay nga negosyo aron maminusan ang red tape ug mas daghang Pilipino ang makahimo sa kaugalingong kuryente.
Nagpagawas ang Department of Energy (DOE) og bag-ong guidelines alang sa rooftop solar systems nga para lamang sa kaugalingong konsumo.
Gitugotan ubos sa Department Circular No. DC2026-08-0017 ang mga consumer nga makahimo og kaugalingong kuryente gamit ang solar panels nga walay pag-export sa sobra nga kuryente ngadto sa distribution grid.
Lakip sa bag-ong polisiya ang Micro-Solar System nga hangtod usa ka kilowatt ug ang Self-Generating Facility Zero-Export Solar System (SGF ZESS) alang sa mas dagkong installation nga adunay safeguards batok sa pagpadala og kuryente ngadto sa grid.
Dili na kinahanglan sa micro-solar systems ang Building Permit ug Certificate of Compliance (COC) gikan sa Energy Regulatory Commission ang kinahanglan na lamang kay ipahibalo sa local distribution utility ang planong installation.
Adunay kagawasan usab sa COC ang kwalipikadong SGF ZESS sa mga panimalay, klinika ug ospital, samtang mahimong ma-exempt sa Building Permit kung adunay valid structural clearance ang building.
Gimandoan ang mga distribution utility nga tangtangon ang pipila ka pre-installation clearances, technical permits ug inspection fees.
Gihatagan usab og 12 ka bulan nga transition period ang mga naggamit pa og analog meter aron makasugod sa paggamit sa solar system samtang gihulat ang pag-ilis o pag-upgrade sa metro.
Sumala ni Energy Secretary Sharon Garin nga tumong sa polisiya nga tangtangon ang mga babag sa paggamit sa solar energy.
Target sa gobyerno nga mosaka sa 35 porsyento sa 2030 ug 50 porsyento sa 2040 ang bahin sa renewable energy sa power generation mix sa nasud.
Apan sumala sa pipila ka home solar advocates, dili lamang red tape ang problema, kondili apil ang taas nga buhis sa solar equipment ug kakulang sa financing options alang sa mga pamilyang gustong mag-install og solar panels.
