Gipunting ni Lanao del Sur 1st District Rep. Zia Alonto Adiong sa ekslusibong pakighinabi sa Bombo Radyo Davao nga ang labing mahinungdanong ebidensiya nga migawas sa ika-12 nga adlaw kaniadtong Agosto 4, 2026 sa impeachment trial ni Vice President Sara Duterte mao ang utilization report, accomplishment report, ug disbursement vouchers nga adunay pirma sa Bise Presidente.
Matod ni Rep. Adiong, ang maong mga dokumento nagpakita nga si VP Sara mismo ang nag-apruba sa paggamit sa confidential funds sa Office of the Vice President (OVP).
Gipasabot niya nga makita sa disbursement vouchers ang physical ug financial plan nga giaprubahan sa Bise Presidente, lakip ang mga programa nga nagsilbing basihan sa pagpagawas sa pondo alang sa 1st, 2nd, ug 3rd quarter sa 2022 ug 2023 alang sa confidential funds sa OVP.
Gipasiugda usab sa Representante ang obserbasyon ni Atty. Roderick Wamil, kanhi Commission on Audit (COA) State Auditor sa Intelligence and Confidential Funds Audit Office (COA-ICFAO), nga adunay mga nakitang discrepancies sa paggamit sa confidential funds.
Sumala sa obserbasyon ni Atty. Wamil, adunay mga paggasto nga gi-classify isip purchase of information ug reward apan naglakip sa mga butang nga dili sakop sa gitugotan sa COA Circular, sama sa paggamit sa pondo alang sa tambal ug uban pang gasto nga wala nalista sa mga gitugotan nga paggamit sa confidential funds.
Tungod niini, giingon ni Rep. Adiong nga maoy nahimong basehan sa pagpagawas sa Audit Observation Memorandum (AOM), nga misangpot sa pag-isyu sa Notice of Suspension. Sa wala pa kini, gihatagan una og 15 ka adlaw ang Office of the Vice President aron makahatag sa mga dokumentong gikinahanglan sa husto nga pag-liquidate sa paggasto sa confidential funds. (VC- Rep. Zia Alonto Adiong )
Dugang pa ni Adiong, wala makahatag ang Office of the Vice President sa mga gikinahanglang ebidensiya nga makapamatuod nga ang paggamit sa confidential funds nga gipatuman subay sa Joint Circular. Tungod niini, wala matino sa Commission on Audit (COA) nga ang paggasto sa maong pondo nahimo sumala sa mga lagda ug giya nga gilatid sa maong circular.
