DAVAO CITY – Gibutyag ni Davao City Covid-19 Task Force spokesperson Dr. Michelle Schlosser nga plano karon sa pipila ka mga pribado nga tulonghaan dinhi sa syudad nga ibulag ang mga bakunado ug di bakunado nga mga magtutungha atol sa in-person classes.
Sumala niini, wala milapas ang palisiya sa mga tulonghaan sa bisan unsa man nga balaud gumikan pribado kini ug mamahimong magpatuman sa ilang kaugalingong lakay alang sa paglikay sa COVID-19 sulod sa ilang gambalay.
Ang nahisgutang mga tulonghaan ang wala nganli ni Schlosser apan giangkon niini nga ang maong palisiya sa mga tulonghaan ang mamahimong makamugna og diskriminasyon sa hut-ong sa mga magtutungha nga bakunado ug dili bakunado.
Apan, mamahimo gihapon nga mubuhat og kaugalingon nga desisyon ang mga pribadong tulonghaan subay sa Davao City Executive Order No. 11 Series of 2022.
Sa pikas bahin, gipasalig ni Jenielito Atillo, tigpamaba sa Department of Education XI, dili kini mamahimong ipatuman sa ahensiya sa mga publiko nga tulonghaan.
Apan, sigun ni Schlosser nga kung mapatuman man kini sa kinatibuk-an, gikinahanglan una nga makigpulong ang mga concerned parties.
Sundon lamang matud pa sa Davao City Task Force ang mandato gikan sa lokal nga panggamhanan, DepEd, ug DOH.
Via || JEN MANGUIOB
