Kung ugaling ang Philippine National Police (PNP) ang pangutan-on, supak sila nga magpabilin si Kingdom of Jesus Christ (KOJC) leader Pastor Apollo Quiboloy sa ilahang Custodial Center sa Camp Crame.
Gipasabot ni PNP Public Information Office chief Col. Jean Fajardo, ang bisan si kinsang indibiduwal nga naaresto ug bisan unsa pa ang kahimtang niini sa kinabuhi, gikinahanglang nabilanggo sa Bureau of Jail Management and Penology (BJMP).
Gihimong ehemplo ni Fajardo ang kaso ni kanhi Bamban, Tarlac Mayor Alice Guo nga anaa sa kustodiya karon sa Pasig City Jail Female Dormitory.
Matod pa usab niini, nasubmitar na sa PNP sa Pasig Regional Trial Court ang medical evaluation nga gihimo sa PNP General Hospital kang Quiboloy.
Ang medical evaluation kang Quiboloy ang mamahimong basihanan sa korte sa paghukom kung angay ba ibalhin o magpabilin kini sa PNP Custodial Center nga adunay kalabutan sa kasong qualified human trafficking nga giatubang ni Quiboloy.
Apan giklaro usab ni Fajardo nga mosunod ang PNP kung unsa ang mamahimong desesisyon sa korte.
Kung kahinumduman, gihirit sa kampo ni Quiboloy ang house arrest gumikan sa kahimtang sa panglawas niini.
Gibalhin na sa Pasig City Jail ang mga kaubanang akusado ni Quiboloy samtang nagpabilin ang nahisgutan sa kustodiya sa PNP.
