DAVAO CITY – Gikabutyag sa Mines and Geosciences Bureau nga usa ang Barangay Masara sa Davao de Oro nga dunay “very high landslide susceptibility rating,” kon dunay taas nga puruhan nga magdahili ang yuta sa maong dapit. Sumala sa buhatan, gawas sa ubos nga kalidad sa yuta, kanunayng apektado sa pagtay-og kon gagmayng kalihukan ang mga lugar ilawom niini.
Gawas sa Masala, nagbaton sab og susamang rating ang mga barangay sa Maco sama sa Mainit, Manipongol, Panoraon, New Leyte, ug Langgam.
Kalabot niini, gikasugyot sa Office of Civil Defense ang pagpuhag sa iresposableng pagmina sa maong lungsod human ang nahitabong landslide.
Gikanayon ni OCD Administrator Ariel Nepomuceno atol sa gipahigayong situation briefing sa Davao City niadtong Miyerkules, adunay panginahanglan alang sa mga interbensyon sama sa “revisiting ug pagporma sa bag-ong mga polisiya ug mga plano nga maglakip sa tanang dagkong mga suba; estriktong pagpatuman batok sa mga kalihokan sa tawo nga makapasamot sa mga problema sama sa iresponsableng mga gawi sa pagmina; pagpanalipod sa kinaiyahan; pagpalambo sa mga proyekto sa pagpugong sa baha ug uban pang mga interbensyon sa engineering; ug permanenteng relokasyon sa mga huyang nga komunidad.”
Namatikdan ni Nepomuceno nga ang mga weather disturbances sama sa shear line, northeast monsoon ug trough sa low pressure area ang miigo sa Davao region karong buwana, nga maoy hinungdan sa halapad nga pagbaha ug pagdahili sa yuta sa rehiyon.
