DAVAO CITY – Nasinati sab sa atong mga kababayan sa United Kingdom ang ilang kasubo atol sa kamatayon ni Queen Ellizabeth II.
Gihinumdum pa sa Bombo International Correspondent nga si Jianne Marie ang taas nga respeto ug pagtagad sa rayna ngadto sa mga Pinoy nurses nga naghatag ug takus nga serbisyo ug pag-alagad sa iyang mga ginsakupan.
Tubong Digos, Davao del Sur si Jianne ug kasamtangang nagpuyo ug nagtrabaho sa UK isip registered nurse, uban ang iyang asawa, duha ka anak, ug iyang inahan.
Gibutyag pa sa atong kababayan nga nagtrabaho isip nurse sa nasud UK, nga kasamtangan nag gipahigayon ang Project London Bridge nga usa ka royal protocol nga magpadayag sa kamatayon ni Queen Elizabeth gikan sa mga taas nga opisyal sa palasyo hangtud sa may pinakadakong katungdanan gawas sa parlyamento. Lakip niini ang paghatud sa patayng lawas sa mipanaw nga rayna gikan sa Balmoral Castle sa Scotland ngadto sa London.
Mulungtad ang maong protocol sulod sa napulo ka adlaw sugod sa adlaw nga namatay ang rayna.
Wala pay hinuon gibutyag nga kumpletong detalye ang Royal Palace mahitungod sa kamatayon sa rayna.
Nagpadayag sab ug pahasubo ang mga lideres sa tibuok kalibutan ilabi na ang mga katawhan sa UK gawas sa Buckingham Palace.
Nanghinaot sab si Jianne nga mahisusama kang Queen Elizabeth II ang pagdumala sa anak sa rayna nga muhulip sa trono isip Hari sa Britanya nga si King Charles.
Giila sa atong kababayan si King Charles isip tigpaduso sa mga lakang kontra climate change ug nag-ila sab sa kaayo sa mga Pinoy medical workers nga nahimong kaabag sa pagbaton ug maayong health care status sa ilang nasud.
via || Bombo LJ Florendo
