Gikabalak-an sa United Nations o UN ang kahimtang sa mga residente sa Yemen tungod sa nagpadayon nga panagbangi sa nasod. Sumala sa UN, kapin 112,000 ka tawo ang nawad-an og pinuy-anan tungod sa maong panagbangi.
Tungod niini, daghang residente ang nagkasakit, ilabina ang mga bata nga apektado sa dengue, cholera ug malnutrisyon. Giatubang usab sa mga ahensya sa UN ang kakulang sa pondo ug limitado nga suplay sa mga hinabang alang sa mga residente sa Yemen.
Dugang pa, mahimong maapektuhan niini ang padayon nga paghatod sa humanitarian assistance ngadto sa mga komunidad nga nanginahanglan.
Kahinumduman nga nagpadayon ang panagbangi tali sa mga sundalo sa Yemen ug Houthi rebels nga misulay sa pagkontrolar sa gobyerno.
Sa pagkakaron, padayon ang UN sa pagmonitor sa kahimtang sa mga residente ug sa panginahanglan alang sa dugang nga humanitarian assistance.
