Mibatikos pag-usab si Vice President Sara Duterte sa administrasyon ni Pangulong Ferdinand Marcos Jr. atol sa iyang pag-atubang sa mga supporters sa Quezon City Justice Hall karong buntaga.
Gipalangan karong adlawa ang arraignment o pagbasa sa akusasyon ni Vice President Sara Duterte sa Quezon City Regional Trial Court alang sa iyang giatubang nga kasong grave threats, tungod sa mga mosyon nga pending pa sa iyang kampo.
Gipahayag sa bise presidente nga dili siya makahawa o magpabiling hilom samtang iyang nakita ang giingong kalisod nga giatubang sa mga Pilipino ug sa ilang mga pamilya.
Gibatikos usab ni Duterte si Pangulong Ferdinand Marcos Jr. ug giakusahan kini nga bakakon ug abusado.
Gibutyag usab niini, nga wala kunoy utang kabubut-on ang Pangulo ngadto sa mga Pilipinong mipili kaniya, ug kinahanglan na kuno kining mohawa sa katungdanan.
Gidasig usab ni Duterte ang iyang mga supporters nga ipadayon ang ilang pakigbisog batok sa mga tawo nga, sumala kaniya, nalambigit sa korapsyon ug uban pang mga isyu.
Sa kasamtangan, padayon gihapon ang legal nga proseso batok sa bise presidente may kalabotan sa iyang giatubang nga kaso.
