Gideklara sa Cinema Exhibitors Association of the Philippines o CEAP ang Septiyembre 12 isip Philippine National Cinema Day. Sa maong adlaw, P100 lamang ang presyo sa regular nga 2D movie screenings sa mga sinehan nga moapil sa maong kalihukan.
Tumong sa CEAP nga mahatagan og higayon ang mga Pilipino nga malingaw ug makatan-aw sa ilang paboritong lokal ug internasyonal nga mga salida sa mas barato nga presyo.
Dugang pa niini, gusto usab sa CEAP nga mahatagan ang publiko og lahi nga kasinatian pinaagi sa pagtan-aw sa sine sa dakong screen ug paggamit sa de-kalidad nga sound system.
Sumala ni CEAP President Irene Jose, usa kini ka selebrasyon alang sa sine ug imbitasyon sa mga Pilipino sa tanang edad nga makasinati sa kalipay ug kalingawan nga mahatag sa pagtan-aw og sine sa mga sinehan.
Gibutyag usab nga pinaagi sa maong kalihukan, gihatagan og higayon ang publiko nga makatagamtam sa ilang paboritong mga salida sa mas barato nga bayad samtang masinati ang sinehan isip lugar alang sa kalingawan ug pagpakig-uban sa pamilya o mga higala.
Gisuportahan usab ang maong inisyatiba sa Film Academy of the Philippines o FAP, Film Development Council of the Philippines o FDCP, Movie and Television Review and Classification Board o MTRCB, ug sa Metro Manila Film Festival pinaagi sa Metropolitan Manila Development Authority o MMDA.
Sa pagkakaron, ang Philippine National Cinema Day gitumong nga mahimong usa ka paagi aron mas mapalapad ang interes sa publiko sa pagtan-aw og sine sa mga lokal nga sinehan ug masuportahan ang industriya sa pelikula sa Pilipinas.
