Gipalapdan sa Department of Agriculture o DA ang pagpalambo sa industriya sa palm oil sa Pilipinas aron maminusan ang halos 90 porsyentong pagsalig sa imported nga suplay. Dili lamang alang sa pagkaon ang palm oil, tungod kay tumong usab sa gobyerno nga magamit kini isip lokal nga materyales alang sa mas limpyo nga matang sa fuel.
Gibutyag ni DA Secretary Francisco P. Tiu Laurel Jr. atol sa budget hearing sa Kamara ang dakong oportunidad sa palm oil industry alang sa mga mag-uuma ug lokal nga negosyante, ilabi na tungod sa taas nga panginahanglan niini sa merkado.
Gipangayo usab sa DA ang inisyal nga P300 milyon nga pondo alang sa 2027 development budget sa palm oil, samtang gisugyot usab ang hangtod P1 bilyon nga tinuig nga alokasyon sulod sa lima ka tuig kung maaprobahan ang balaod alang sa maong sektor.
Subay sa roadmap sa gobyerno, target nga mapaabot ngadto sa 300,000 ektarya ang mga palm oil plantation sa nasud. Giisip usab nga dakong lakang kung maabot ang 100,000 ektarya sa dili pa matapos ang 2028.
Aron mapadali ang pagpatuman sa mga programa, gisugyot sa DA ang pagtudlo og lahi nga Deputy Administrator ug pagporma og dedikadong team sulod sa Philippine Coconut Authority o PCA nga motutok sa palm oil development.
Gisuportahan usab sa mga opisyal ug kawani sa DA ang pagpasa sa gisugyot nga Palm Oil Bill, diin nag-andam sila og opisyal nga rekomendasyon alang kang Pangulong Ferdinand R. Marcos Jr. aron ideklarar kini nga urgent bill.
