Gidayeg sa Duyog Bangsamoro, usa ka nasudnong koalisyon sa nagkalainlaing sektor nga nagsuporta sa kalinaw sa Bangsamoro, ang pagsugod sa pagserbisyo sa unang piniling parlamento sa Bangsamoro Autonomous Region in Muslim Mindanao o BARMM.
Sa ilang pahayag kaniadtong Domingo, Nobyembre 1, 2026, gihulagway sa koalisyon nga gilangkuban sa 15 ka civil society organizations ang paglingkod sa unang 80 ka piniling miyembro sa Bangsamoro Parliament isip usa ka dugay nang gihulat nga kalampusan ug dakong lakang padulong sa tinuod nga awtonomiya sa rehiyon.
Nahimo ang unang parliamentary elections niadtong Septiyembre 14, human kini nadelatar sa upat ka higayon sukad natukod ang BARMM kaniadtong 2019.
Gidawat usab sa grupo ang pagkapili kang Abdulraof “Sammy Gambar” Macacua isip unang Chief Minister sa regular nga parlamento, diin nakakuha kini og suporta gikan sa 51 ka miyembro sa parlamento.
Samtang, gilauman sa koalisyon nga makigtambayayong si Macacua sa tanang miyembro, lakip ang minoriya ug mga grupo sa oposisyon, ug respetuhon ang tingog sa nagkalainlaing sektor samtang panalipdan ang awtonomiya sa rehiyon batok sa dili angay nga pagpanghilabot sa gawas.
Mipuli si Macacua kang MILF Chair Ahod “Al Haj Murad” Ebrahim, nga kaniadto nagsilbing interim chief minister sa panahon sa Bangsamoro Transition Authority o BTA. Natapos ang mandato sa BTA sa paglingkod sa mga piniling miyembro sa parlamento niadtong Oktubre 30.
Giawhag usab sa Duyog Bangsamoro ang bag-ong parlamento nga panalipdan ug ipadayon ang mga balaod nga gipasa sa BTA, lakip ang mga probisyon batok sa political dynasty ug alang sa gender quota, ingon man ang Bangsamoro Indigenous Peoples’ Act ug Bangsamoro Transitional Justice and Reconciliation Act.
Gipunting usab sa koalisyon ang panginahanglan sa mga reporma batok sa pagkaylap sa armas, gerrymandering, korapsyon ug nepotismo.
Dugang pa sa grupo, daghan pa ang wala matuman nga mga saad ubos sa normalization phase sa 2014 Comprehensive Agreement on the Bangsamoro, lakip ang pag-decommission sa mga manggugubat sa MILF ug ang gisaad nga socioeconomic assistance package.
Samtang, mipasalig si kanhi interim Chief Minister Ebrahim nga ipadayon ang iyang paningkamot alang sa mga reporma, maayong pangagamhanan, kalinaw ug kalamboan sa katawhang Bangsamoro bisan wala niya makuha ang posisyon sa Chief Minister sa unang regular nga parlamento.
Sa katapusan,gidayeg usab ni Presidential Peace Adviser Mel Senen Sarmiento ang gipakita ni Ebrahim nga statesmanship, ilabi na ang pag-una sa kaayohan sa Bangsamoro labaw sa politikal nga kalainan.
