Gipatin-aw ni US President Donald Trump nga wala siya nagadali sa paglusad og bag-ong pag-atake batok sa Iran, samtang nagpadayon ang mga paningkamot sa mga tigpataliwala aron mahunong na ang gubat.
Sa iyang pahayag kaniadtong Oktubre 31, 2026, gikanayon ni Trump nga maayo ang dagan sa negosasyon tali sa mga partido, hinungdan nga hatagan pa niya og higayon ang diplomatikong paningkamot.
Bisan pa niini, gipahibalo usab sa presidente nga adunay usa o duha pa ka target nga gikinahanglan nilang tutokan, lakip ang mga pasilidad sa ilalom sa yuta nga adunay kalabotan sa nuclear infrastructure sa Iran.
Samtang, nagpadayon sa Doha, Qatar ang indirect negotiation, diin apil ang Qatar ug Egypt sa mga nasud nga naningkamot nga makab-ot ang kasabutan aron matapos ang panagbangi.
Kabahin sa gihisgotan ang sugyot sa Iran nga ablihan pag-usab sulod sa 48 oras ang Strait of Hormuz, usa ka importante nga ruta sa kalibotan alang sa transportasyon sa lana ug uban pang produkto sa enerhiya.
Apan nagtakda ang Iran og mga kondisyon, lakip ang pagtangtang sa naval blockade sa Estados Unidos, pagpagawas sa ilang mga kabtangan nga gi-freeze, ug paghunong sa mga silot batok sa ilang oil exports.
Dugang pa, nagpadayon ang kabalaka sa posibleng pag-usab sa tensiyon pag mahuman na ang US midterm elections karong Nobyembre 3,2026. Una nang naghulga si Trump nga posibleng maglusad pag-usab og pag-atake batok sa Iran.
Sa pagkakaron, nagpabiling nagkasumpaki ang mga paningkamot sa diplomasya ug ang hulga sa posibleng pagpadayon sa panagbangi sa Middle East.
