DAVAO CITY – Iduso na ang kasong reckless imprudence resulting in multiple homicide and physical injuries, ingon man damage to property ang atubangon sa usa ka driver kinsa gitudlong hinungdan sa nahitabong akisidente bandang alas nuebe sa buntag kagahapon sa Purok 2, Hijo, Maco-Mati Davao Coastal Road sa Maco, Compostela Valley nga maoy resulta sa kamatayon sa tulo ka mga indibidwal ug gika-angol sa 17 pa ka mga indibidwal.
Sa ulahing report sa Maco Police Station, nalambigit sa maong aksaidente ang Navarra pick-up, Toyota Innova ug ang public utility multicab.
Una ng gibutyag ni Maco Police Station commander Captain Woody Sabdani nga ang Toyota Innova ug pick-up susama nga nagsubay sa susama nga direksiyon dihang mi-overtake ang Innova pinaagi sa outer lane.
Apan sa dihang pabalik na ang Innova sa iyang proper lane, mibangga kaniya ang pick-up hinungdan nga misungag sab kini sa multicab nga anaa sa opposite lane.
Lakip sa maong casualties mao sila si Bern Gestapa, Zaida Rongoc ug Alberto Cambal, multicab driver.
Samtang ang mga pasahero sa Innova naila nga sila si Paulino Camay ug ang iyang driver nga si Leonardo Camay, diin dali kini nga gidala sa pinakaduol nga hospital.
Samtang ang driver sa Navarra pick-up ang naila nga si Robert Paul Molina nga anaa sa kustodiya sa Maco Municipal Police Station, samtang tanan nga samaron ang nagpa-alim na karon sa hospital sa Tagum City.
