DAVAO CITY – Giangkon ni Davao City Mayor Sara Duterte nga malangan pa ang pagpatukod og oxygen plant sa dakbayan sa Davao.
Sumala kang Mayor Sara Duterte, gumikan kay muagi pa sa daghanang proseso ang nasangpit nga proyektom ug gikinahanglan usab nga makumpleto ang mga dokumento una masugdan ang pagpatukod niini.
Kahinumdumang giaprubahan sa 19th City Council sa Davao ang pagpagwas sa pondo gikan sa 30% nga Quick Response Fund (QRF) sa 5% Calamity Fund sa Davao City alang sa tuig 2021.
Nagkantidad og 11 milyon pesos ang gigahing pondo human nga naamyendahan ang Local Disaster Risk Reduction and Management Fund Investment Plan (LDRRMFIP) sa syudad.
Target nga itukod ang nasangpit nga planta sa Brgy. Maa, Davao City.
Gawas sa oxygen plant, nakatakda usab ang lungsod nga mupalit og 1000 oxygen tanks nga tubag sa kakulang sa suplay nga gigamit sa mga pasyente nga positibo sa Covid-19
