DAVAO CITY – Bisan nga plano sa lokal nga kagamhanan nga isugyot ang pagpailalom sa dakbayan sa Alert Level Zero o wala nay ipatuman nga mga restrictions, apan dili pa gihapon mamahimo nga tangtangon ang face mask sa higayon nga maaprubahan kini.
Gikanayong nag-una nga rason niini mao ang wala pa nakab-ot sa dakbayan ang 100 porsyento nga vaccination target.
Sa higayon nga wagtangon na sab ang restrictions sa pagsuot ug facemask, lisud na sab nga ipasabot ngadto sa katawhan kung ipabalik kini sa pagsuot sa higayon nga adunay mamatikdan na sab nga subling pagsaka o surge sa mga natakdan ug kagaw.
Kahinumduman nga adunay pipila ka mga nasud ang nagwagtang na sa pagsuot ug facemask apan dihang nakatala na sab sila ug pagsaka sa positive cases, subli na sab nila kini nga gibalik.
Bisan nga mas luag na matud pa karun ang mga restrictions, gipasabot sa Covid-19 task force nga kinahanglan mutamod pa gihapon sa minimum public standards sanglit adunay mga bag-ong variant na sab sa Covid-19 ang mitumaw.
Nag-unang katuyuan lamang karon sa pagpaluag sa restrictions sa siyudad mao ang pagbangon sa ekonomiya nga labing naapektohan sukad nga nagsugod ang pandemiya.
