Gipalig-on sa Commission on Audit (COA) ang notice of disallowance sa kapin P73 milyon nga confidential funds nga gigamit sa Office of the Vice President (OVP) niadtong 2022.
Base sa audit findings, ang maong kantidad kabahin as P125 milyon nga confidential funds nga gigasto sulod lamang sa pipila ka adlaw sa Disyembre 2022. Sumala pa sa COA, nga dako ang bahin sa disallowed amount nga may kalabotan sa kakulangan o kawalay igo nga dokumento nga magpamatuod sa paggamit sa pondo, ilabi na sa giingong reward payments ug uban pang gastohan.
Gipatin-aw sab sa COA nga ang pag-isyu og notice of disallowance nagpasabot nga ang paggasto mahimong giila nga “irregular,unnecessary, excessive, extravagant, o unconscionable” base sa balaod sa auditing sa gobyerno.
Lakip sa mga giingong kakulangan mao ang kawalay dokumento nga nagpakita sa resulta sa intelligence gathering o surveillance activities nga gigamit isip basehan sa paggasto sa pondo. Dugang pa, adunay bahin sa pondo nga gigamit sa pagpalit og mga kagamitan sama sa lamesa, lingkuranan, ug computer nga wala klarong koneksyon sa confidential operations.
Samtang niini, gipahibalo nga ang OVP nag-andam sa pag-apelar sa maong disallowance, ug giingon nga ang notice dili pa final ug executory hangtod mahuman ang legal nga proseso.
Padayon ang diskusyon ug imbestigasyon sa paggamit sa confidential funds sa gobyerno, uban ang panawagan alang sa transparency ug accountability sa paggasto sa pondo sa publiko.
