Giplano sa Estados Unidos ang pagkasa og ikaduhang round sa negosasyon uban sa Iran sa dili pa mahuman ang ceasefire sa Abril 21.
Sumala pa sa usa ka source nga pamilyar sa maong isyu, nagpadayon ang internal nga diskusyon sa mga opisyal sa administrasyon ni Donald Trump alang sa posibleng ikaduhang in-person meeting uban sa mga opisyal sa Iran.
Lakip niini, nagpabilin nga abli si US President Donald Trump sa pagpadayon sa in-person negotiations sa labing dali nga panahon, kon andam na ang Iran nga motuman sa iyang mga kondisyon o demands.
Sa pagkakaron, ginatan-aw pa sa mga opisyal ang posibleng petsa ug lokasyon kon asa ipahigayon ang sunod nga negosasyon, samtang nagpadayon ang pakigpulong sa Iran ug sa mga mediators sa rehiyon sulod sa umaabot nga mga adlaw.
Apan, dili pa klaro kung motuman dayon ang Iran sa mga kondisyon sa Estados Unidos, subay sa naunang pagtutol niini sa pipila ka demands sa Amerika, ingon man sa pagsugod sa giingong blockade sa US military sa mga pantalan sa Iran niadtong Lunes sa oras sa sidlakang bahin sa Amerika.
