DAVAO CITY – Extended hangtud unang semana sa Agosto ang pagparehistro alang sa buot muapil sa mga kompetisyon sa 37th Kadayawan Festival sulod bulan.
Sumala kang Kadayawan Executive Committee Spokesperson Davao City Councilor Al Ryan Alejandre, plantsado na ang mga kasaulogan sa Kadayawan alang sa face-to-face celebration niini karong tuiga human sa duha ka tuig nga nahunong kini gumikan sa COVID-19 pandemic.
Samtang, muabot na sa 17 ang partisipante ang mirehistro alang sa Indak-Indak sa Kadalanan diin 10 niini ang anaa sa open category nga gikan pa sa nagkadaiyang lugar sama sa Zamboanga, samtang pito ang Davao based category.
Muabot sab sa P1 million pesos ang premyo alang sa mahimong kampyeon sa Indak-Indak sa Kadalanan.
Samtang Php 500,000 alang sa second place; Php 300, 000 alang sa third place; Php 200,000 sa fourth place ug walay muuli nga pildi tungod sila tanan makadawat og Php 20,000 isip consulation prize.
Tulo sab ang judging place alang sa Indak-Indak diin ang unang showdown ipahigayon sa may rotanda duol sa Freedom Park inay sa Marco Polo Hotel.
Muagi sab sila sa Claveria ug Bonifacio hangtud sa San Pedro diin asa ipahigayon ang final showdown.
Susamang rota sab ang agian alang sa Floral Float Parade.
Samtang ubay-ubay na sab ang nagparehistro alang sa Pamulak sa Kadayawan.
Alang sa big-category, adunay 10 ka-ihap ang buot muapil; 5 sa small category; 10 sa alternative samtang 20 sab sa korporasyon.
Mukabat gikan sa 50,000 hangtud kapin Php 500,000 ang premyo sa kompetisyon niini depende sa kategorya.
Subli gipahimangnoan sa opisyal ang katawhang dabawenyo nga musunod sa minum public health protocols, mahimong disiplinado ug mahimong matinud-anon sa pag-fill up sa health declaration form diin mao ang kinahanglan alang sa mga partisipante sa Kadayawan.
Samtang ang mga indibidwal nga adunay mga sintomas ginahangyo nga dili na mupartisipa.
Gilauman sab nga muabot sa 50,000 ka bisita o turista ang mutambong atol sa subling pagbalik sa face-to-face Kadayawan Festival dinhi sa dakbayan sa Dabaw.
Via || Hana Rallos
