Magul-anon ang nahimong pagbisita ni Governor Raul Mabanglo ug first district Congresswoman Maricar Zamora-Mabanglo sa Davao de Oro Provincial Hospital (DDOPH) sa Montevista sa nakalabay nga adlaw atol sa ilahang gipahigayon nga inspeksyon ang mga pasilidad.
Sa nahimo niining pagbisita emosyunal ang magti-ayong opisyal tungod sa ilahang nakita nga sitwasyon sa mga pasyente nga gaantos sa kakulangan sa pasilidad ug imprastraktura nga gisugdan lamang apan wala gihuman.
Sumala pa sa pamahayag sa bag-ong Gobernador nga imbis nga maayo ang pasyente basin musamot pa hinuon ang sakit sa mga nahisgutan.
Nasayran nga mibisita ang magti-ayong opisyal sa ospital aron lamang sa pagsuta sa mga proyekto ug ingon man ang pagplastar sa mga pasilidad ug imprastraktura kinsa migahin na og pondo gikan sa Congressional initiative alang sa maong proyekto.
Gibutyag sa ni Gov. Mabanglo nga wala niini nauyunan ang nasampit nga sitwasyon sa kapin duha ka oras niining pagtuyok sa ospital tungod sa mga nakita nga sitwasyon sa mga pasyente nga nahan-ok lamang sa mga wards sa ground floor ug naglaray sa mga hallway gumikan sa wala nahuman ang nasugdang second floor ward building.
Nasayran usab nga ang maong proyekto nasugdan niadtong 2023. Nasayran usab nga ang ubang mga kagamitan sa ospital nagkulang, sama sa bentilador, walay saktong patubig sa CR ug labaw sa tanan mga tambal nga nagkulang, tungod bisan sumala pa paracetamol sa gawas na paliton gumikan wala sumala pa’y mapalit sa sulod sa ospital.
Tungod niini, gimando karon sa bag-ong gobernador nga solusyunan ang maong problema ug hatagan og pagtagad ang mga serbisyo sa nasampit nga ospital ilabi na ngadto sa mga pasyente og mga tigbantay niini.
Gipasalig usab niini nga mapunduhan ang ospital sa hisgutanang pinansyal pinaagi usab sa tabang sa iyahang asawa nga si Cong. Maricar Zamora.
Gikalipat usab kini sa mga pasyente og mga watchers sa nasampit nga ospital ang gihimong aksyon sa bag-ong lider sa nasampit nga probinsya.
