Gilusad sa Philippine National Police ang nagkadaiyang operasyon batok sa cybercrime nga misangpot sa pagkaaresto sa 15 ka indibidwal nga giingong cyber scammers, samtang mokabat sa 36 ka financial accounts ang nasakmit sa nagkalain-laing bahin sa nasud.
Sumala pa sa kapulisan, ang maong aksyon kabahin sa ilang gipakusgan nga kampanya batok sa online scam nga padayon nga nagbiktima sa katawhan. Lakip sa mga nadakpan ang mga personahe nga gipasanginlang nalambigit sa mga iligal nga online nga transaksyon ug pagpangilad.
Sa pagkakaron, padayon ang imbestigasyon aron masuta ang dugang pang miyembro sa maong grupo, subay sa nakalap nga intelligence report ug mga reklamo gikan sa mga biktima. Sa kasamtangan, ginabantayan usab sa mga awtoridad ang ubang kahina-hinalang financial activities nga posibleng konektado sa sindikato.
Dugang pa niini, gipadayag ni PGen Jose Melencio C. Nartatez Jr. nga dili motugot ang kapulisan nga magpadayon ang pagpangilad sa publiko.
“Hindi natin hahayaang mananatiling biktima ang ating mga kababayan ng mga online scam. Patuloy ang ating operasyon para tiyakin ang kanilang proteksyon,” matud pa sa hepe sa PNP.
Padayon usab ang koordinasyon sa ubang ahensya sa gobyerno aron mapalig-on ang kampanya batok sa cybercrime ug masiguro ang proteksyon sa publiko batok sa modernong pamaagi sa pagpangilad.
