Gikumpirma ni Ombudsman Jesus Crispin “Boying ” Remulla nga naaprubahan na sa Anti-Money Laundering Council (AMLC) ang gihangyo nga freeze order batok sa mga asset ni kanhing House Speaker Martin Romualdez, nga dunay kalambigitan sa giimbestigahang flood control projects anomaly.
Sumala pa ni Remulla, gipasaka na sa AMLC ang maong freeze order ngadto sa Court of Appeals aron pormal nga mapatuman ang pag-freeze sa mga kabtangan. Lakip sa sakop sa freeze order mao ang 25 ka bank accounts sa mambabalaud, 10 ka insurance policies nga nakarehistro sa iyang pangalan, 27 ka bank accounts, 10 ka insurance policies, ug usa ka investment account nga nakapangalan usab sa mambabalaud.
Dugang pa niini, naapil usab ang duha ka bank accounts, pito ka property accounts, ug usa ka real estate property nga nakapangalan sa usa ka corporate entity. Sa pagkakaron, gipadayag ni Remulla nga adunay unom ka kaso nga may kalabotan sa flood control scandal ang andam na isampa sa sunod semana.
Sa kasamtangan, padayon ang imbestigasyon sa mga otoridad aron masuta pa ang uban pang posibleng nalambigit sa maong kontrobersiya.
