Gipahibalo sa Department of Migrant Workers (DMW) nga luwas na nga nakagawas sa persian gulf ang 1,100 ka pilipinong tripulante.
Sumala pa sa ahensya, kini atol sa nagpadayon nga tensiyon sa tungang sidlakan nga miulbo niadtong Pebrero 28. Gikanayon ni DMW Secretary Hans Leo Cacdac nga dakong bahin sa mga pilipinong seafarers ang nakaluwas na, lakip na kadtong sakay sa mga barko nga naglawig sa strait of hormuz.
Lakip sa mga barko nga naapil sa evacuation ang lima ka cruise ships nga adunay sakay kapin 800 ka pilipinong tripulante. Sumala pa niini, nagpatuman og precautionary measures ang mga barko diin gipausab ang ilang ruta o mibiya sa mga high-risk areas.
Sa pagkakaron, padayon ang hugot nga monitoring sa dmw sa paglayag sa mga barkong adunay sakay nga pilipinong seafarers pinaagi sa marine traffic systems. Dugang pa niini, padayon usab ang koordinasyon sa mga manning agencies ug shipowners aron masiguro ang kaluwasan ug kaayohan sa mga pilipino tripulante.
Giingon usab sa ahensya nga abli ang communication lines sa DMW alang sa mga apektadong tripulante ug ilang pamilya aron masiguro ang padayon nga update ug suporta.
