Mipadayag og pagsuporta si Senador Francis “Chiz” Escudero sa plano ni Davao del Norte Governor Edwin Jubahib nga mopalit og krudo alang sa probinsya nga kini ang mga lokal nga inisyatibo aron maseguro ang suplay sa fuel ug kini angay nga suportahan ilabi na sa panahon nga dili stable ang presyo ug dili sigurado ang kahimtang sa merkado.
Gidayeg usab sa beteranong magbabalaod ang lakang sa gobernador ug gipasiugdahan nga mga lakang alang sa lokal nga paningkamot aron maseguro ang suplay sa mga importanteng panginahanglanon angay nga dasigon ilabi pa nga kini gihimo nga transparent ug mosunod sa mga balaod ug regulasyon sa nasud.
kahinumduman nga gipamahayag ni Jubahib nga ang probinsya nagtinguha sa pagpalit og diesel gikan sa gawas sa nasud, apan daghang detalye ang wala pa mapaklaro sa kasamtangan.
Wala pa niya napadayag kung asa kuhaon ang fuel ug iyang giangkon nga dili makaya sa probinsya ang orihinal nga plano nga mopalit og 44 milyon ka litros sa diesel.
Aron matubag kini, giingon sa gobernador nga ang iyang administrasyon nakigsabot na sa Development Bank of the Philippines (DBP) ug sa provincial treasurer aron tan-awon ang posibleng mga paagi sa financing.
Samtang gipaklaro usab niini nga ang bisan unsang kasabutan kinahanglan nga mosunod sa mga balaod sa Pilipinas, ilabi na sa mga regulasyon sa pag-import sa petrolyo, procurement, ug pagsulod sa mga petroleum products sa nasud.
Matod ni Jubahib, ang transaksyon mahimong iporma isip government-to-government nga kasabutan o ipaagi sa mga acridited nga mga pribadong kompanya, uban sa pagdumala sa mga national agencies sama sa Department of Energy aron masiguro ang pagsunod sa mga regulasyon.
