Malampusong nadakpan sa mga operatiba sa Regional Special Operations Group 11 (RSOG 11) ubos sa Police Regional Office 11 (PRO 11) ang usa ka suspek ug nakompiska ang kapin PhP 1,253,900 nga kantidad sa ilegal nga sigarilyo atol sa joint operation sa gabii niadtong Abril 22, 2026 sa Brgy. Camanchiles, Matanao, Davao del Sur.
Nakompiska ang 25 ka mastercase ug 39 ka mga pakete sa nagkadaiyang brand sa gidudahang ilegal nga sigarilyo nga adunay gibanabanaan nga kantidad nga PhP 1,253,900.
Gipahigayon ang operasyon sa RSOG 11 uban sa Matanao Municipal Police Station.
Sumala pa nagsugod kini gikan sa padayon nga surveillance operation nga orihinal nga nagtumong sa paglapas sa Republic Act 10591, apan nadiskubre usab ang ilegal nga kalihokan sa sigarilyo.
Ang tanang ebidensya giselyohan ug giimbentaryo sa lugar mismo atubangan sa suspek ug sa usa ka barangay opisyal aron masiguro ang transparency ug pagsunod sa standard operating procedures.
Sa pagkakaron ang dinakpan anaa na sa kustodiya sa Matanao Municipal Police Station, samtang ang mga ebidensya giturn-over na sa hustong awtoridad alang sa disposisyon ug pagpassaka sa kaso.
Gidayeg ni PRO 11 Regional Director PBGEN Leon Victor Z. Rosete ang mga operatiba tungod sa ilang paspas ug koordinadong aksyon.
Matod niya, nagpakita kini sa gipalig-on nga kampanya batok sa tanang matang sa iligal nga kalihokan subay sa direktiba ni PNP Chief PGEN Jose Melencio C. Nartatez Jr.
Matod pa niya, klaro ang mensahe nga dili tugotan ang iligal nga negosyo sa komunidad ug magpadayon ang kapulisan sa istriktong pagpatuman sa balaod ug pagpanalipod sa publiko batok sa economic sabotage.
