DAVAO CITY – Maka-alarma matud pa ang pag-ubos sa kantidad sa piso kontra dolyar kini human nga misadsad na sa pinaka-ubos niini nga kantidad sulod sa halos duha ka dekada ang Philippine Peso human nga magsara ang pagbinayloay niini sa dolyar ngadto sa P54.98.
Kini ang pinaka-ubos nga kantidad sa pagbinayloay sukad niadtong Nobyembre 21, 2005 sa dihang miabot kini sa P54.74 ang matag dolyar.
Sa pakighinabi sa Bombo Radyo Davao kang Prof. Ramon Beleno III, usa ka political analyst dinhi sa Davao, gikanayon niini nga medyo maka-alarma ang pag-ubos sa kantidad sa peso batok dolyar diin kahinumduman nga nagsugod ang Pilipinas karong tuiga nga anaa lamang sa P51 pesos ang bili sa matag usa ka dolyar.
Gibutyag usab ni Beleno nga dili lamang ang nasud Pilipinas ang apektado niini apan lakip na usab ang ubang mga asian countries ang nakasinati sab og de-value sa ilang currency.
Apan ang nakalahi lamang matud pa, pinakapaspas ang nasinatian sa Pilipinas diin doul na kini sa dies porsyento (10%) nga pagde-value.
Dugang pa ni Beleno nga usa sa immediate concern mao ang pagpalit og mga imported products tungod mas mahal na kini karon gumikan sa ubos nga bili sa peso.
Usa sa mga imported products nga pinaka-unang maapektohan mao ang mga petroleum products nga kinahanglan gayud sa nasud gumikan mao kini ang ginagamit alang sa transportasyon ug manufactruing.
Gumikan usab sa pagtaas sa presyo niini, klaro usab nga adunay pagtaas sa presyo sa mga basic commodities o nag-unang palaliton.
Via || Allianne Ferandos Silao
