Sugdan sa sunod semana ang House of Representatives sa deliberasyon sa gisugyot nga P7.2 trilyong pambansang badyet alang sa 2027. Sumala pa kang House Appropriations Committee Chairperson Rep. Mikaela Angela Suansing, sugdan ang budget hearings sa Lunes, Agosto 17 ug gitakdang matapos sa Oktubre 9, sa wala pa ang Undas break sa Kongreso.
Gibutyag pag-usab ni Suansing nga pagahimuon sa mga magbabalaod ang hugot ug detalyadong pagsusi sa pondo nga iyang gitawag nga “people’s budget”. Lakip sa maong proseso ang pakigpulong sa mga non-government organizations o NGOs ug uban pang hingtungdan nga sektor ngadto sa mga magbabalaod aron masuta ug mahisgutan pag-ayo ang mga alokasyon sa proposed national budget.
Dugang pa niini, gipahibalo ni House Speaker Bojie Dy nga ipadayon sa ubos nga kapulungan ang mga safeguards nga gisagop niadtong 2025 aron malikayan ang pagbalik sa mga giingong kwestyonableng pag-insert og pondo sa national budget. Lakip sa maong mga mekanismo ang Budget Amendments and Review Subcommittee ug ang live-streaming sa mga miting sa bicameral committee aron masiguro ang mas bukas ug transparent nga proseso sa pag-apruba sa badyet.
Kahinumduman nga niadtong Martes, Agosto 11, pormal nang gihatag sa Department of Budget and Management o DBM ngadto sa Kongreso ang 2027 National Expenditure Program o NEP, nga nagsilbing proposed budget sa administrasyon ni Presidente Ferdinand Marcos Jr.
Sa pagkakaron, nag-andam na ang House of Representatives alang sa serye sa mga hearing diin susihon ang mga programa, proyekto ug pondo sa nagkalain-laing departamento ug ahensya sa gobyerno.
