Giklaro ni Senator Robinhood “Robin” Padilla nga dili niya hagiton si Senador Ronald “Bato” Dela Rosa nga boluntaryong mopasakop sa iyang kaugalingon kalabot sa arrest warrant nga giisyu sa International Criminal Court o ICC.
Matud ni Padilla, katungod ni Dela Rosa ang dili pagpakita sa publiko ug magpabiling nagtago, ilabina kay wala man kunoy arrest warrant nga giisyu sa Pilipinas ug wala usab lokal nga korte ang nagmando sa pagdakop kaniya.
Gipahayag pa sa senador nga bisan siya mismo, dili usab mopasakop kon ang maong arrest warrant gikan lamang sa ICC ug dili sa lokal nga korte.
Niadtong Nobyembre 3, personal nga mitambong si Padilla sa Department of Justice aron motubag sa panel of prosecutors kalabot sa preliminary investigation sa reklamong obstruction of justice nga gisang-at batok kaniya.
Gipasaka ang reklamo human giakusahan si Padilla nga mitabang kang Dela Rosa nga makagawas sa Senado aron malikayan ang pagpatuman sa arrest warrant sa ICC.
Apan, gibasura ni Padilla ang maong alegasyon ug miingon nga dili kini matawag nga pag-ikyas tungod kay wala kunoy mandamiento de aresto nga gikan sa lokal nga korte.
Gidawat usab sa senador nga nasina siya kang Dela Rosa tungod kay mga langyaw nga awtoridad pa ang nangita niini.
Gikumpara pa ni Padilla ang ilang sitwasyon sa mga bayaning Pilipino nga sila Macario Sakay ug Gat. Andres Bonifacio.
