DAVAO CITY- Natangag sa kawatan ang kapin P200,000 nga kantidad sa kwarta nga gipanag-iyahan sa usa ka sundalong giilang si Kenn Ralp Medida Cain, 23-anyos, minyo ug residente sa Block 11 Lot 14, Veterans Village 1 Malagamot, Panacan human nga gilungkab ang panimalay niini sa wala pa mailhing suspetsado.
Saysay sa biktima, namatikdan na lamang niini nga guba na ang pultahan sa ilang kusina ug gipugos matud pa nga giguba ang pultahan sa ilang master’s bedroom kung asa nahimutang ang P200,000 nga kantidad sa kwarta. Lakip sa gikuha sa kawatan ang usa ka packbag nga nagkantidad ug P4,000.
Lakip sab nga gilungkab ang tindahan niini ug nakuha ang pipila ka pakete sa sigarilyo ug ilimnong makahubog.
Sumala sa nakasaksi nga si Maria Cicille Lipasan, bandang alas 12:10 sa udto, nakamatikod kini nga adunay usa ka lalaki ang migawas sa panimalay sa biktima bitbit ang pula nga bag dayong misibat sa likod nga bahin sa panimalay.
Gikanayong mihawa ang mga biktima sa ilang panimalay bandang alas 10 sa buntag ug pasado alas onse sa buntag subay sa kuha sa CCTV camera, namatikdan ang pagsulod sa suspek agi sa likud nga bahin.
Nagpahigayon na karun og lalom nga imbestigasyon ang otoridad alang sa hinanali nga pag-ila sa suspek ug pagsikop niini.
Via || Bombo Bryan Abe
