Gibanabanaan nga moabot sa P170 bilyon matag tuig ang mawagtang nga kita sa gobyerno kung tangtangon ang value added tax (VAT) sa mga produktong petrolyo, sumala ni Energy Secretary Sharon Garin niadtong Biyernes, Abril 10, 2026.
Sa press conference, gibutyag ni Garin nga ang VAT sa petroleum products usa ka dako nga bahin sa koleksyon sa gobyerno, busa kung tangtangon kini, magresulta usab kini og dakong kakulang sa kita sa kagamhanan.
Dugang pa niya, gikinahanglan ang pag-amyenda sa kasamtangang balaod sa dili pa mapatuman ang pagtangtang sa VAT sa fuel products.
Samtang, gibutyag usab ni Marikina Representative Miro Quimbo nga posible pang mosamot ka grabe ang sitwasyon sa nasud kung tangtangon ang VAT, ilabi na taliwala sa padayong krisis sa Middle East.
Misaka ang presyo sa lana human sa unom ka semana nga gubat sa rehiyon, nga nakapa-grabe pa sa krisis sa Strait of Hormuz nga usa sa mga nag-unang agi-anan sa global nga suplay sa lana nga nakadugang sa global crisis sa enerhiya.
