-- ADVERTISEMENT --

Gisugdan na sa Department of Social Welfare and Development o DSWD Field Office XI ang pag-apod-apod sa pinansyal nga ayuda alang sa mga benepisyaryo sa Unified Package for Livelihoods, Industry, Food, and Transport o UPLIFT Program pinaagi sa GCash.

Gipahigayon ang seremonya sa pagsugod sa maong pamaagi niadtong Nobyembre 18, 2026, sa Crisis Intervention Section sa DSWD Field Office XI.

Pinaagi niini, madawat na sa mga kwalipikadong benepisyaryo ang ilang ikatulo ug ika-upat nga tranche sa pinansyal nga tabang nga mokabat sa 4,000 pesos pinaagi sa ilang GCash accounts.

Tumong sa bag-ong pamaagi nga mas pasayon ug mas paspason ang pagdawat sa ayuda, ilabi na sa mga pamilyang nanginahanglan og pinansyal nga suporta.

Ang UPLIFT Program kabahin sa whole-of-government response nga gilusad ubos sa Executive Order No. 110 nga gipirmahan ni Presidente Ferdinand Marcos Jr. aron mamenosan ang epekto sa global energy crisis ug mapanalipdan ang kaayohan sa mga Pilipino, ilabi na ang mga labing nanginahanglan.

-- ADVERTISEMENT --