-- ADVERTISEMENT --

Gisusi sa Department of Energy (DOE) ang posibilidad sa pagpasaka og kasong legal batok sa mga oil companies ug gasoline stations nga napakyas sa pagpatuman sa hustong pagpaubos sa presyo sa petrolyo.

Sumala kang Oil Industry Management Bureau Director Rino Abad, miabot sa 213 ka gasoline stations ang ilang giinspeksyon gikan Nobyembre 10 hangtod 13.

Sa maong gidaghanon, 114 ang nakaplagang wala nagpatuman sa hustong price rollback.

Matod sa ahensya, imbes nga ipatuman ang tukmang pagpaubos sa presyo, kulang o dili tukma ang diskwento nga gihatag sa pipila ka gasoline stations.

Personal usab nilang gisusi ang 97 sa maong mga estasyon aron masiguro ang pagsunod sa direktiba.

-- ADVERTISEMENT --

Niadtong Biyernes, pormal nang gipasa sa grupo ang inspection report ngadto sa legal department sa DOE alang sa angay nga legal nga aksyon.

Nagpahigayon usab og miting ang mga field office ug legal services aron hisgotan ang posibleng mga lakang ug kaso batok sa mga nakalapas.

Duha ka balaod ang gikonsiderar sa ahensya sa pagtuon sa mga dokumento. Una, ang Oil Regulation Law, diin ang dili pagtuman sa gimando nga price adjustment mahimong silotan og tulo ka bulan hangtod usa ka tuig nga pagkabilanggo ug multang P50,000 hangtod P300,000.

Ikaduha, ang Presidential Decree 1865, ilabi na ang Section 2(E) nga nagdili sa sobra nga pagpataas sa presyo sa mga produktong petrolyo.

Ang mga malapas niini mahimong mag-atubang og administratibong multa nga P10,000, pagsuspinde o pagbawi sa permit, ingon man kriminal nga silot nga P20,000 hangtod P50,000 ug pagkabilanggo sulod sa duha hangtod lima ka tuig.

Isip kabahin sa proseso, gihatagan og 72 ka oras ang mga apektadong gasoline stations aron makasumite og katin-awan pinaagi sa show cause order.

Kadaghanan sa ilang mga rason mao nga aduna pa silay stock sa petrolyo nga napalit sa mas taas nga presyo gikan sa ilang mga mother company niadtong miaging semana.

Apan giklaro sa DOE nga nahisgotan na kini uban sa legal services ug mga oil companies. Matod sa ahensya, kon dali nga ipatuman ang pagsaka sa presyo kon mosaka ang kantidad sa petrolyo, kinahanglan patas usab nga ipatuman ang pagpaubos niini panahon sa price rollback.

Samtang, nagpatuman na usab ang DOE og bag-ong oil price rollback nga adunay P1.50 nga pagpaubos sa matag litro sa gasolina, P3.80 sa diesel ug P5.80 sa kerosene.