-- ADVERTISEMENT --

Gipahinumdoman ni Davao City Councilor Danilo “Danny” C. Dayanghirang ang mga ginikanan nga bantayan dili lamang ang pisikal nga kalihokan kondili apil usab ang mental health ug kinatibuk-ang kahimtang sa ilang mga anak.

Gihimo ni Dayanghirang ang maong pahinumdom atol sa sesyon sa Sangguniang Panlungsod niadtong Nobyembre 17, 2026, diin iyang gipasiugda ang responsibilidad sa mga ginikanan sa paggiya ug pagmonitor sa mga kalihokan sa kabataan.

Gikutlo usab niini ang Article 220 sa Family Code nga naglatid sa mga katungdanan sa mga ginikanan, lakip ang pagpanalipod sa pisikal ug mental nga kahimsog sa ilang mga anak, ingon man ang pagdumala sa ilang mga kalihokan ug pakig-uban sa ubang tawo.

May kalabotan kini sa nagpadayong isyu sa bullying sa dakbayan nga nakaapekto sa sektor sa edukasyon ug nagdala usab og mga pangutana bahin sa paggiya ug pagdumala sa mga estudyante sulod sa mga eskwelahan.

Samtang, gipahinumdoman usab sa konseho ang panginahanglan nga maklaro ang mga imbestigasyon nga may kalabotan sa maong mga insidente aron matubag ang mga pangutana ug masuta ang mga lakang nga angay ipatuman.

-- ADVERTISEMENT --