Mukabat sa P14.5M ang financial assistance nga gitakdang itunol sa Davao City alang sa 27 ka mga local government units nga nadeklara og state of calamity gumikan Bagyong Carina.
Kini human naaprobahan sa 20th City Council ang ordinansa nga nagtumong sa pagpagawas og assistance gikan sa Quick Response Fund ug Calamity Fund sa Davao City nga dakong tabang ngadto sa mga apektadong pamilya.
Sumala pa sa hepe sa CDRRMO nga si Alfredo Baluran, ginahuman na lamang karon ang pipila ka mga rekisitos sa LGU uban ang pasalig nga gilayon kining itunol kung galing mahuman na ang mga papeles.
Sa maong kantidad, gikatakdang makadawat og tinag P1M ang probinsya sa Bataan, Rizal, Pampanga, Bulacan, Cavite, ug Batangas.
Makadawat usab og tinag P500k ang mgga syudad sa Quezon, Marikina, Manila, Navotas, ug uban pa. Samtang P300K alang sa mga munisipalidad sa Cainta Rizal, Bauang La Union, San Mateo Rizal ug uban pa.
Kahinudmuman nga una nang gikanayon ni Mayor Baste Duterte nga naandan na sa syudad ang pagtabang sa nagkinahanglang pamilya bisan paman kaniadto sanglit ang labing mahinungdanon matud pa karong panahona mao ang pag-tinabangay.
