Mihinay sa 2.1 porsyento ang pagtubo sa Gross Domestic Product (GDP) sa Pilipinas atol sa ikatulong kwarter sa 2026 tungod sa pagkunhod sa sektor sa agrikultura ug industriya, bisan pa sa padayon nga pagtubo sa sektor sa serbisyo.
Matod ni National Statistician Claire Dennis Mapa, mao kini ang pinakaubos nga pagtubo sa ekonomiya sukad sa unang kwarter sa 2021, panahon sa pandemya sa COVID-19. Gawas sa panahon sa pandemya, mao na kini ang labing hinay nga pagtubo sa ekonomiya sa nasud sukad sa katapusang kwarter sa 2009.
Tungod niini, gipahibalo sa Department of Economy, Planning and Development (DEPDev) nga lisod nang makab-ot sa nasud ang gipakunhod nga target nga 3.5 hangtod 4.5 porsyentong pagtubo sa ekonomiya karong tuiga.
Matod ni DEPDev Secretary Arsenio Balisacan, gikinahanglan nga motubo sa 6.3 porsyento ang GDP sa ika-upat nga kwarter aron maabot man lang ang pinakaubos nga bahin sa maong target.
Gipunting sa Philippine Statistics Authority (PSA) nga ang sektor sa serbisyo ang nag-unang nagpalihok sa ekonomiya human kini mitubo sa 3.7 porsyento. Apan, mikunhod sa 4.8 porsyento ang sektor sa agrikultura, samtang mikunhod usab sa 0.003 porsyento ang industriya, lakip na ang padayon nga pag-ubos sa kalihokan sa publikong konstruksyon sulod sa unom ka sunod-sunod nga kwarter.
Lakip sa nakaapekto sa ekonomiya sa nasud ang pagsaka sa presyo sa lana ug nagkalain-laing palaliton tungod sa gubat sa Middle East, ingon man ang epekto sa mga miaging kalamidad ug mga kontrobersiya sa paggasto sa pondo sa gobyerno.
Gituohang nakapakunhod usab kini sa pagsalig sa mga negosyante ug mga konsumidor sa kahimtang sa ekonomiya sa nasud.
