Isailalom sa full alert status ang tibuok National Capital Region (NCR) sugod sa Lunes,Hulyo 6, 2026 dungan sa pagsugod sa impeachment trial ni Vice President Sara Duterte.
Gikumpirma kini ni National Capital Region Police Office (NCRPO) Chief PMGen. Anthony Aberin, nga miingon nga gikan sa kasamtangang heightened alert status, ipataas pag-usab ang lebel sa kahandam sa kapulisan human sa tulo ka adlaw nga rally sa Iglesia ni Cristo (INC).
Sumala sa NCRPO, sa kinatibuk-an malinawon ang mga panagtigom sa INC bisan pa sa tensyon nga natala sa unang adlaw sa rally sa EDSA People Power Monument. Wala usab matala ang seryosong aksidente human mibalhin ang protesta sa Liwasang Bonifacio sa Maynila.
Samtang, gipahibalo sa Philippine National Police (PNP) nga andam na ang tanang security preparations alang sa impeachment trial sa Bise Presidente.
Mokabat sa 6,000 ka mga pulis ang ideploy sa palibot sa Senado aron masiguro ang kahapsay ug seguridad sa pagbukas sa paglilitis.
Matud ni PNP Public Information Office Chief PCol. Allen Rae Co, gimando ni PNP chief PGen. Jose Melencio Nartatez Jr. sa tanang kapulisan nga magpabiling disiplinado, walay piniliay, ug magpokus sa pag-alagad sa publiko.
Gipasiugda ni Nartatez nga kabahin sa padayon nga pagsusi sa sitwasyon sa kapulisan ang pagpataas sa alert status aron maseguro ang igong seguridad samtang gitahod ang katungod sa mga lungsuranon.
