DAVAO CITY – Gikabutyag sa NBI 11 nga posibleng mamahimong talamak na ang pagparehistro sa mga scammers nga gigamit ang ilang laing peke nga identity aron makapanlimbong og tawo kon dili buhaton sa bahin sa mga telcos ang mga paagi aron mapahugtan pa ang pagparehistro ilawom sa SIM Registration Law.
Sumala ni Ely Leano, ahente sa NBI 11 atol sa pakighinabi sa Bombo Radyo Davao, wala sab ideya ang buhatan nganong nakasulod ang susamang mga profiles sa mga rehistrante og SIM cards bisan pa man sa daw hugot nga mga lakang sa pagkuha og basic information sa mga telcos.
Dugang pa sa buhatan, wala pay nadakpan sa maong salaod apan ilaha sab namatikdan nga posibleng gipaluyohan kini sa mga sindikato nga nakamugna og mga pre-registered sim cards nga magamit sa bisan unsang digital scams sama sa investment scheme.
Gisugyot karon sa ahensya nga mubalik sa basic registration diin ang tawo mismo ang magparehistro in-person aron masayran ang pagkatinuod sa matag rehistrante. Sa pagkakaron, nagpadayon gihapon ang pag-monitor sa mga scammers sa rehiyon.
via || Bombo LJF
