Gipahibalo ni Myanmar President Min Aung Hlaing nga repasohon sa iyang administrasyon ang umaabot nga relasyon sa nasud ngadto sa Association of Southeast Asian Nations (ASEAN), human niyang giangkon nga adunay dili patas nga pagtratar sa rehiyonal nga pundok.
Ang maong baroganan atubangan sa kapin 540 ka magbabalaod ug mga opisyal sa Naypyitaw, kapital sa Myanmar, human sublion sa mga lider sa ASEAN atol sa ilang summit sa Pilipinas nga kulang gihapon ang pag-uswag sa Myanmar sa pagpatuman sa five-point peace plan.
Gihulagway sa presidente nga dili makatarunganon ang pahayag sa ASEAN, diin giinsistir niya nga nagpakita lamang kini sa personal nga baroganan sa pipila ka lider ug dili sa hiniusang desisyon.
Dugang pa niini, gikuwestiyon usab niya ang ASEAN tungod sa giangkon nga pagpahamtang og politikal nga pagpamugos ug pagpakaulaw sa Myanmar, nga sumala kaniya wala ipahamtang sa ubang mga nasud nga miyembro bisan pa sa ilang kasinatian sa kudeta ug krisis politikal sukad sa pagkatukod sa ASEAN kaniadtong 1967.
Bisan pa sa pagrebyu sa relasyon ngadto sa tibuok pundok, gipatin-aw ni Min Aung Hlaing nga ipadayon gihapon sa Myanmar ang pakig-uban sa tagsa-tagsa ka mga nasud nga miyembro sa ASEAN. Giplano usab sa iyang administrasyon ang pagpahigayon og peace conference sa Pebrero 2027 alang sa pagkab-ot sa malungtarong kalinaw.
Kahinumdoman nga nagpabiling nahimulag sa daghang kalihokan sa internasyonal nga komunidad ang Myanmar, diin wala na tugoti ang mga taas nga opisyal niini sa pagtambong sa dagkong tigom sa ASEAN sukad sa pag-ilog sa militar sa gahum gikan sa administrasyon ni Former State Counsellor Aung San Suu Kyi niadtong 2021.











