Gidayeg ni Philippine National Police (PNP) Chief General Jose Melencio Nartatez Jr. ang mga police commander ug personnel tungod sa malampusong pagpatuman sa mga lakang pangseguridad atol sa 49th ASEAN Summit ug sa mga kaubang tigom niini.
Matud ni Nartatez, natuman sa PNP ang mga gipasalig nga lakang aron maseguro ang kaluwasan sa mga langyaw nga delegado ug sa mga venue diin gipahigayon ang summit.
Kapin 23,000 ka mga pulis ang gipakatap alang sa seguridad, samtang kapin 630 ka mga tigom ang malampusong gipahigayon nga walay natala nga aberya.
Bisan pa niini, kapin 200 ka mga nagprotesta ang gidakop human giingong misulay sa pagsulod sa Philippine International Convention Center sa Pasay City kung asa gipahigayon ang ASEAN Summit. Sumala sa PNP, napugngan sa mga kapulisan ang mga demonstrador nga makaduol sa maong venue human sila gibabagan ug gibungkag ang ilang panagtapok.
Nagpasalamat usab si Nartatez sa ubang ahensiya sa gobyerno nga mitabang sa pagmintinar sa kalinaw ug kahapsay atol sa maong kalihokan.
Giawhag usab sa PNP Chief ang mga kapulisan nga ipadayon ang samang dedikasyon ug propesyonalismo sa pagtuman sa ilang inadlaw-adlaw nga katungdanan diha sa mga komunidad.











