Gipabilin sa Moody’s Ratings ang “Baa2” investment-grade credit rating sa Pilipinas uban ang stable outlook, usa ka desisyon nga gikalipay sa Department of Finance ug Bangko Sentral ng Pilipinas.
Matod ni Finance Secretary Frederick Go, nagpakita ang rating nga lig-on gihapon ang economic fundamentals sa nasod bisan sa global energy shock ug paghinay sa government spending alang sa infrastructure projects.
Sumala sa Moody’s, nagpabiling lig-on ang fiscal consolidation ug debt stabilization sa gobyerno bisan sa kasamtangang paghinay sa ekonomiya.
Apan, gipaubos sa Moody’s ang growth forecast sa Pilipinas alang sa 2026 ngadto sa 3.6 porsyento gikan sa 5.5 porsyento. Gipakunhod usab ang 2027 projection ngadto sa 5.3 porsyento gikan sa 5.6 porsyento.
Gipataas usab ang projected current account deficit ngadto sa 4 porsyento sa GDP, samtang gibanabana nga mosaka sa 58 porsyento sa GDP ang general government debt burden sa 2026.
Samtang, gipabilin sa 3.9 porsyento sa GDP ang projected government deficit. Matod sa BSP, magpadayon kini sa mga lakang aron mapalig-on ang inflation, banking system, payment system ug international reserves sa nasod.| VIA BOMBO EROS PAJOTA
