DAVAO CITY – There’s no success without hardship.
Mao kana ang kanunay nga ginatiman-an sa usa ka Mindanawon nga nahimong 1st placer sa bag-ohay lamang natapos nga June 2022 Criminoligst Licensure Examination.
Sa gipagula nga resulta sa Professional Regulations Commission o PRC, nakakuha og 90.70% nga passing rate ang tubong Cotabato City nga si Lyen Carel Togonon Garcia nga mi-graduate sa University of Mindanao.
Sa nahimong pakighinabi sa Bombo Radyo Davao kang Garcia, gikanayon niini nga wala sya nagdahum nga mag-top 1 sa maong licensure exam gumikan bugtong gina-ampo niini mao ang makasulod siya sa Rank 10.
Sa dihang nakita ni Garcia ang pangalan niya nga anaa sa 1st place, wala matud pay kabutngan sa iyang kalipay.
Apan luyo niini, giangkon ni Garcia nga ayha paman sya nag review sulod sa unom ka bulan, gisulayan una niya nga mag-apply sa Philippine National Police Academy o PNPA niadtong 2021 apan pakyas kining makasulod sa final quota.
Gumikan niini, nakasinati og hopelessness si Garcia.
Hinoon, wala nawad-an og paglaum ang consistent honor student gikan elementary hangtud college nga si Garcia ug giisip niini nga aduna pay muabot nga para kaniya ug mao kana ang mag-una sa maong Licensure exam.
Gikan January hangtud June, unom ka bulan nga rigid review, anaa sa average nga 17-18 hours matag adlaw ang ginagamit niini.
Hilabihan sab ang pasalamat ni Garcia sa tanang misuporta kaniya ilabi na sa iyang inahan nga nahimo niyang giya ug inspirasyon sa iyang pagtuon.
Sa gipahigayong exam sa mga buot mahimong lisenyadong pulis sa nasud, 12,698 gikan sa 41,913 ka mga examinees o anaa sa 30.30% ang pasado gikan sa 19 ka mga testing centers sa tibouk nasud.
