Gibutyag ni Councilor Pamela Librado-Morata nga wala matud pa’y gibating sakit sa lawas ang kapin 200 ka empleyado sa gi-raid nga steel company sa Brgy. Ilang, Davao City nga iyang nahinabi niadtong Agosto 17.
Matod pa ni Morata, Chairperson sa Committee on Civil, Political and Human Rights ug Committee on Labor and Employment Opportunities, halos tanan sa mga trabahante nga iyang nakaistorya wala nagreklamo og sakit samtang nagtrabaho sa maong kompanya.
Dugang pa, gibutyag sa mga empleyado nga ginapailalom sila sa medical checkup matag unom ka bulan ug ginapasa ang resulta ngadto sa kompanya.
Lakip sa kasamtangang isyu ang alegasyon bahin sa giingong substandard ug radioactive nga bakal nga maoy gitutokan sa imbestigasyon.
Sa pagkakaron, giklaro ni Morata nga subject for confirmation pa ang mga pahayag sa mga empleyado ug kinahanglan pa masuta pinaagi sa tukmang pagsusuri.
Padayon ang imbestigasyon aron matino ang kamatuoran bahin sa giingong radioactive materials ug posibleng epekto niini sa mga trabahante. | VIA BOMBO EROS PAJOTA
