DAVAO CITY – Nahimong malinawon ang gipahigayong mga lihok protesta sa Freedom Park sa may Roxas Avenue, Davao City atol sa nahitabong State of the Nation Address ni Pangulong Bongbong Marcos kagahapon sa hapon.
Kanya-kanya og pasibaw sa mga nagkandaiyang mulo ang mga militanteng grupo nga nagkatapok-tapok dungan sa pagpadayag sa katawhan sa mga kalampusan ning kasamtangang administrasyon. Nanawagan ang Anak-bayan Southern Mindanao ngadto sa Administrasyong Marcos nga solusyonan na ang krisis nga ginakaatubang sa Pilipinas.
Sumala sa tigpamaba nga si Beverly Gofredo, ilang gipaabot sa gobyerno ang mulo gikan sa katawhan mahitungod sa pagpataas og sweldo kon 1,100 pesos nga family living wage ingon man ihunong na ang sige’g pagsunod sa mga mandu sa Estados Unidos ug China.
Sumala ni Gofredo, tumong sa maong lihok protesta aron nga mapasibaw ang batakang katungod nga wala matud pa giila sa administrasyong Marcos sa ika-unang tuig niini sa sulod sa iyang termino.
Gilauman usab sa mga kabatan-onan atol sa ika-duhang SONA sa pangulo, mao ang pagpapaspas sa mga polisiya nga gimugna sama sa Maharlika Investment Fund, pagbiyahe niini sa laing nasud, ug ang mga gipasigarbo nga mga imprastraktura.
Apan alang kang Gofredo, adunay mga lakang nga wala matud pa nalakip sa SONA sa pangulo sa iyang pagpangatungdanan isip ang Pangulo sa nasud.
Gawas sa Anak-bayan, gipasibaw usab sa lain-lain pa nga mga grupo ang ilang sentimento ug kritisismo sa administrasyon, diin lakip sa mga grupo mao Piston, Kilusang Mayo Uno, Act-Teachers Partylist, Kabataan, Bayan, Grabriela, Selda, Sabokahan, ug uban pa.
via || Bombo HJR & Bombo LJF
