DAVAO CITY – Sama dinhi sa Pilipinas, apektado sab karon ang pipila ka mga Overseas Filipino Workers (OFWs) nga nakabase karon sa Vancouver, Canada.
Sumala pa kang Bombo international correspondent Rowell John Cabundocan, lumad nga taga Davao ug nakabase na karon sa nahisgutan nga nasod, naka-stay at home lamang kini karon ilabi na nga ubay-ubay na sab ang mga nataptan sa Covid-19 sa lugar.
Nagpatuman na sab sumala pa ug lockdown sa area kini aron nga mapugngan ang pagkuyanap sa virus.
Nanirado na sab sumala pa ang pipika mga establisyemento sa lugar ug limitado na lamang sab ang ginatugutan nga mogawas.
Nanawagan na lamang kini sa mga Filipino nga unta motamud kung unsa man ang kamandoan gumikan kay alang kini sa kaayohan sa tanan.
Samtang sa bahin ni Bombo international correspondent Joyce Cono Martinez, nga upat ka tuig na nga nakabase sa California, USA, hugtanon na matud pa ang gipatuman nga seguridad sa lugar bisan nga nakatala na sila ug 24 ka kaso.
Istrikto sab sumala pa nga gipatuman nga social distancing ug online na sab ang pagpalit og mga pagkaon.
Ginabilin na lamang sab nila sa pultahan ang ilang ginahatag nga mga pagkaon ngadto sa ilang mga higala nga buot nila nga bisitahon.
